Mahawani News - Leading Coverage Across Maharashtra & Chandrapur

चंद्रपूरच्या शिक्षण विभागात भ्रष्टाचाराच्या आरोपांमुळे निलंबन, एसआयटीमार्फत चौकशीची मागणी; शिक्षण क्षेत्रात खळबळ

कल्पना चव्हाण यांचे सोशल मीडिया वरील छायाचित्र

• महावाणी : विर पुणेकर
• २७ ऑगस्ट २०२४

चंद्रपूर : चंद्रपूरच्या शिक्षण विभागात मोठा भूकंप घडला आहे. तत्कालीन शिक्षणाधिकारी (माध्यमिक) श्रीमती कल्पना चव्हाण यांना त्यांच्या कार्यकाळातील गंभीर अनियमिततेच्या आरोपांनंतर अखेर शासनाने निलंबित केले आहे. ही कारवाई विदर्भ माध्यमिक शिक्षक संघाचे सरकार्यवाह तथा आमदार सुधाकर अडबाले यांच्या तारांकित प्रश्नाच्या माध्यमातून पावसाळी अधिवेशन २०२४ मध्ये करण्यात आलेल्या मागणीनंतर करण्यात आली.

अनेक शिक्षक आणि शिक्षकेतर कर्मचाऱ्यांच्या तक्रारींमुळे चव्हाण यांच्यावर कारवाईची मागणी सातत्याने होत होती. या संदर्भात आमदार सुधाकर अडबाले यांनी सभागृहात तारांकित प्रश्न उपस्थित केला होता, ज्यावर शिक्षण मंत्री दीपक केसरकर यांनी ठाम उत्तर देत, "चौकशी पूर्ण झाल्यानंतर आठवड्याभरात कारवाई केली जाईल," असे सांगितले होते. या वचनानुसार, शालेय शिक्षण व क्रीडा विभागाच्या सहसचिवांनी आज चव्हाण यांना तात्काळ निलंबित करण्याचा आदेश काढला आहे.

चव्हाण यांच्या निलंबनाने चंद्रपूरच्या शालेय शिक्षण विभागात मोठी खळबळ उडाली असून, विभागातील इतर अधिकारीही आता आपल्या भूमिकेबाबत सावध झाले आहेत. एसआयटीमार्फत त्यांच्या संपत्तीची चौकशी करण्याचीही मागणी पुढे आली आहे, ज्यामुळे भ्रष्टाचाराचा पर्दाफाश होईल आणि दोषींना शिक्षा होईल, अशी अपेक्षा आहे.

या कारवाईमुळे शिक्षण क्षेत्रातील अधिकारी आणि कर्मचाऱ्यांमध्ये एकप्रकारे भीतीचे वातावरण निर्माण झाले आहे. अनेक अधिकारी आणि कर्मचारी आता आपल्या भूमिकांबाबत अधिक जबाबदारीने वागण्याची अपेक्षा केली जात आहे.

सदर प्रकरणाच्या तपासात शिक्षण विभागातील विविध स्तरांवर झालेल्या घोटाळ्यांचा समावेश करण्यात येणार आहे. शिक्षणाधिकारी कल्पना चव्हाण यांच्या कार्यकाळातील संपत्तीचा तपशील तपासण्यात येईल, ज्यात बेकायदेशीर मिळकतींचा शोध घेतला जाणार आहे. 

 "शिक्षक आणि शिक्षकेतर कर्मचाऱ्यांच्या प्रकरणात हलगर्जीपणा व अनियमितता करणाऱ्या कोणत्याही अधिकाऱ्यांची गय केली जाणार नाही." -आमदार सुधाकर अडबाले

#ChandrapurEducation #Corruption #KalpanaChavan #VidarbhaTeachersUnion #SITInvestigation #SudhakarAdbale #DeepakKesarkar #EducationScandal #MaharashtraPolitics #MahawaniNews