Mahawani

सिंधुदुर्गातील शिवरायांच्या पुतळ्याच्या कोसळण्याने महाराष्ट्राच्या अस्मितेला डाग; दोषींवर कठोर कारवाईची मागणी

इंदिरा गांधी सांस्कृतिक सभागृह, चंद्रपूर समोर निषेध प्रदर्शन करतेवेळीचे छायाचित्र

महावाणी : विर पुणेकर
२८ ऑगस्ट २०२४

चंद्रपूर : काल चंद्रपूरमध्ये संभाजी ब्रिगेडने एकत्र येऊन छत्रपती शिवाजी महाराजांच्या पुतळ्याच्या अपमानाच्या अत्यंत गंभीर घटनेच्या विरोधात जोरदार निषेध प्रदर्शन आयोजित केले. सिंधुदुर्गात आठ महिन्यांपूर्वी उभारलेला शिवाजी महाराजांचा पुतळा एकाएकी कोसळून पडल्याने संपूर्ण महाराष्ट्रात तीव्र असंतोष व्यक्त झाला आहे. या घटनेने महाराष्ट्राच्या अस्मितेला गंभीर धक्का बसला असून, संभाजी ब्रिगेडने या मुद्द्यावर तीव्र प्रतिक्रिया व्यक्त केली आहे.

समारोहाच्या उद्घाटनाच्या दिवशी भारताचे प्रधानमंत्री नरेंद्र मोदी यांनी पुतळ्याचे उद्घाटन केले होते आणि भारतीय नौदलाच्या अखत्यारीत या पुतळ्याचे बांधकाम पूर्ण झाले होते. परंतु, केवळ आठ महिन्यांतच या पुतळ्याने अपमानास्पद स्थितीला पोहोचल्याने महाराष्ट्रभरात नाराजी आणि आक्रोश व्यक्त केला जात आहे. यामुळे शिवाजी महाराजांच्या गौरवशाली इतिहासाला धक्का बसला असून, त्याच्या अप्रतिम कार्याची आणि अपूर्व कर्तृत्वाची पायमल्ली झाली आहे.

संभाजी ब्रिगेडने या परिस्थितीचा गंभीरतेने आढावा घेतला आणि चंद्रपूरमध्ये आयोजित केलेल्या निषेध प्रदर्शनात ठामपणे कळवले की, सार्वजनिक बांधकाम मंत्री रवींद्र चव्हाण, शिल्पकार जयदीप आपटे, कंत्रातदार डॉ. चेतन पाटील आणि अन्य दोषींवर तात्काळ कठोर कारवाई केली जावी. या कारवाईत केवळ दोषींवर गुन्हे दाखल करणेच नाही, तर त्यांना अटक करून सखोल तपासही करावा, अशी मागणी त्यांनी केली आहे.

विश्वस्त सूत्राच्या माहितीप्रमाणे, आपटे हा अवघा पंचवीस वर्षाचा असून याला पुतळ्याच्या निर्मितीचा अनुभव नसल्याचे सांगितले जात आहे, आणि पोलिसांनी आपटेच्या कल्याण येथील घरावर केलेल्या छाप्यात घराला कुलूप असून आपटेंचे सर्व भ्रमणध्वनी क्रमांक बंद आहे. शिल्पकार जयदीप आपटे हा सध्या फरार असल्याचेही सांगितले जात आहे.

संभाजी ब्रिगेडचे जिल्हाध्यक्ष प्रा. डॉ. दिलीप चौधरी, महानगर अध्यक्ष विनोद थेरे, आणि इतर पदाधिकारी यावेळी उपस्थित होते. त्यांनी ठामपणे सांगितले की, “छत्रपती शिवाजी महाराज हे आपल्या सर्वांसाठी अभिमानाचे प्रतीक आहेत. त्यांच्या पुतळ्याच्या अपमानाचे पातक हे महाराष्ट्राच्या सर्व जनतेचे अपमान आहे. आम्ही या घटनेचा अत्यंत कडक विरोध करत आहोत आणि प्रशासनाला सूचित करतो की जर या प्रकरणात तात्काळ कारवाई न केली तर संपूर्ण महाराष्ट्रात मोठे आंदोलन उभारले जाईल.”

यावेळी संभाजी ब्रिगेडने छत्रपती शिवाजी महाराजांच्या पुतळ्याच्या अपमानाविरुद्ध महाराष्ट्रात मोठ्या प्रमाणावर जनआंदोलन करण्याचा इशारा दिला. त्यांनी नमूद केले की, “राज्य सरकारने लवकरात लवकर दोषी अधिकाऱ्यांवर कठोर कारवाई केली नाही, तर संभाजी ब्रिगेड संपूर्ण महाराष्ट्रात महाक्रांतीचा इशारा देईल आणि सरकारला जागृत करण्यासाठी आंदोलन करेल.”

या निषेध प्रदर्शनात उपस्थित महिलांनी आणि तरुणांनी शिवाजी महाराजांच्या पुतळ्याच्या अपमानाच्या विरोधात जोरदार घोषणा दिल्या, तसेच प्रशासनाच्या निष्क्रियतेवर कठोर टीका केली. त्यांच्या वतीने प्रस्तुत केलेले निवेदन राज्य सरकारला पोहोचवण्यात आले असून, यावर तात्काळ कारवाईची अपेक्षा आहे.

संभाजी ब्रिगेडने त्यांची वचनबद्धता स्पष्ट केली आहे की, छत्रपती शिवाजी महाराजांच्या गौरवशाली परंपरेचा अपमान सहन केला जाणार नाही आणि यावर योग्य न्याय मिळवण्यासाठी ते सर्वप्रकारे लढणार आहेत.

छत्रपती शिवाजी महाराज हे अखंड भारताचे प्रेरणास्थान आहे त्यांचा पुतळा बनवितानाच शेकडो वर्षाचा दूरदृष्टीकोन ठेवून बनवायला पाहिजे होता परंतु लोकसभेच्या निवडणुकीमध्ये शिवरायांच्या नावावर मत मागण्याचा हेतू ठेवून हा पुतळा घाईघाईने बसविण्यात आला तसेच या पुतळ्याच्या सक्षमतेकडे दुर्लक्ष करण्यात आले त्याचाच परिणाम म्हणून काल छत्रपती शिवरायांचा पुतळा कोसळून बंदोस्त झाला हा एक प्रकारे छत्रपती शिवरायांचा व शिवप्रेमींचा घोर अपमान आहे यासाठी राज्य सरकार व केंद्र सरकारने तात्काळ माफी मागितली पाहिजे सोबतच कंत्राटदार व पुतळा बनविणारा शिल्पकार या दोघांवरही गुन्हे दाखल करून त्यांना अटक करा. या घटनेची नैतिक जबाबदारी स्वीकारून महाराष्ट्राच्या सार्वजनिक बांधकाम मंत्री रवींद्र चव्हाण यांनी राजीनामा दिला पाहिजे. - प्रा. डॉ. दिलीप चौधरी, जिल्हाध्यक्ष, संभाजी ब्रिगेड, चंद्रपूर, सिनेट सदस्य गोंडवाना विद्यापीठ गडचिरोली