Mahawani News - Leading Coverage Across Maharashtra & Chandrapur

पर्यायी मार्ग नसल्याने अपघातांची शक्यता.

महावाणी - विर पुणेकर
०८ ऑगस्ट २०२४

चंद्रपूर/हडस्ती : हडस्ती येथील काँक्रिट मार्गाचे काम अत्यंत मंद गतीने सुरू असल्यामुळे स्थानिक रहिवासी आणि वाहनचालकांना मोठ्या प्रमाणावर अडथळे येत आहेत. दीर्घकाळापासून सुरू असलेल्या या कामामुळे नागरिकांमध्ये नाराजी पसरली आहे. वाहनचालकांना रोजच्या प्रवासात मोठ्या त्रासाला सामोरे जावे लागत आहे. दुचाकी आणि चारचाकी वाहनचालकांना या कामामुळे वारंवार कोंडीचा सामना करावा लागत आहे. ( hadasti )

सदर मार्गाचे काम एका बाजूने सुरू असल्याने मार्गावरून ये-जा करणाऱ्यांना पर्यायी मार्गाची सुविधा उपलब्ध नसल्याने या मार्गावरील वाहतूक प्रचंड गर्दीची झाली असून वाहनचालकांना अपघातांचा धोका पत्करून प्रवास करावा लागत आहे. तसेच रात्रीच्या वेळी अपूर्ण कामामुळे वाहनचालकांना आणखी जास्त धोका निर्माण झाला आहे. ( Hadasti concrete road work is slow, inconvenience to motorists )

मंदगतीने होत असलेल्या कामामुळे व मार्गाच्या खराब अवस्थेमुळे वाहनांचे देखभाल खर्चही वाढला आहे. नागरिकांनी प्रशासन आणि संबंधित ठेकेदारांना याबाबत तक्रारी केल्या असल्या तरी अद्याप या कामाची गती वाढविण्यात यश आलेले नाही.

स्थानिक प्रशासनाने या समस्येची गांभीर्याने दखल घेणे आवश्यक आहे. मार्गाचे काम लवकरात लवकर पूर्ण करण्यासाठी अधिक मनुष्यबळ आणि संसाधने तैनात करावीत. यामुळे नागरिकांच्या दैनंदिन जीवनातील त्रास कमी होईल आणि अपघातांची शक्यता कमी होईल.

नागरिकांनी देखील आपली तक्रार अधिक प्रभावीपणे मांडून यावर त्वरित उपाययोजना करण्याची मागणी करावी. कामाची गती वाढवून मार्गाचे काम पूर्ण झाल्यानंतर या मार्गावरील वाहतूक सुरळीत होईल आणि नागरिकांना दिलासा मिळेल. ( mahawani ) ( chandrapur )